2021年10月7日

《馋死老克拉》鲁迅个条头糕，我个重阳糕上海老底子思念昨天以下文章来源于吳越小豬，作者高佩明【华丽时尚】纽约~上海中国网络你我的吳越情節。介紹吳越語言、上海老底子每天呈送精彩文章一组打开尘封的记忆，寻觅往昔的岁月叙上海老底子事忆上海老底子人诉上海老底子情鲁迅个条头糕我个重阳糕作者：沈嘉禄改编：丁迪蒙配乐：周俊朗读：高佩明（上）鲁迅个条头糕，我个重阳糕（上）音频： 00:00/06:48 秋天是收获个季节，新米、园蔬、水鲜，南北水果次第涌了过来……秋天也是糕饼个季节。勒农村，新谷轧米磨成粉，蒸几笼米糕庆祝丰收。城里向呢，勒沈大成、王家沙、乔家栅等等老字号个门前头，从早到夜勒排队，赤豆糕、黄松糕、条头糕、松花团、粢毛团、双酿团、玫瑰方糕……还有老派上海人庆生个辰光必勿可少个寿桃搭仔松糕。上海人家乔迁新居，一定要买交关定胜糕分别送拨邻舍隔壁。定胜糕腰细、两头大，形状好比是木匠师傅拼接木板用个腰榫。“定胜”搭仔“定榫”谐音，像榫头一锤敲定，寄托勒新环境里向长居久安个美好愿景。定胜糕呢，成双作对，喜感十足，红曲粉染成个浅红色个倩影，有眼怕丝丝个躲勒一边，但是，最抢眼个肯定又是伊。定胜糕一要蒸软了再吃，糕皮仍旧松松软软，像流沙一样细个豆沙馅子一直甜到了心里。清明时节，搭仔太太一道到杭州南山祭扫父母亲个墓，下半日到清河坊去散散心，看到点心铺个临街柜台勒勒现蒸现卖定胜糕。小小个木模，每只木模蒸一只，铺米粉，下豆沙馅，再罩一层米粉，师傅个手脚邪气快。等到脱了模，我还看到底下头囥勒一块打了交关小孔个铝皮，用来引导蒸气上升，邪气可爱个。上海个老人过生日，小辈会得拨伊吃寿桃。勒所有个糕团里向，我最欢喜条头糕。乌红颜色个豆沙馅受到糯米皮子个适度挤压，像煞要破茧而出，撒勒表面个伊眼零零碎碎个糖桂花常庄勒夕阳下头闪勒金子一样个光芒，吃起来有种扎足个口感。搿份小确幸，是每个上海人侪能够轻易获得个。同时代个文人回忆鲁迅，讲起鲁迅勒熬夜写稿子个辰光，常备个夜宵就是条头糕。夏丏尊勒《鲁迅翁杂忆》一文里写到：“斋夫摇寝铃前买好送进房间，周六夜里备得更富足。” 有人讲鲁迅爱吃甜食是留学个辰光养成个习惯。指间沙则认为：“鲁迅搿能介夜夜吃条头糕，竟然勿腻，怕是需要童年时代就打下个胃底子吧。伊是浙江绍兴人，江浙一带正是又甜又糯个糕团占领区”。（见《舌尖上个上海》）我个故乡也是绍兴，我也从小吃惯糯米糕团。我一直觉着鲁迅应该更喜欢另外一种糕团，搿就是绍兴所产个乌豇豆糕。乌豇豆糕以糯米粉搭仔豇豆为食材，加一种由乌饭树叶子捣成功个汁液揉，搓成粗粗实实个长条，上笼屉蒸熟，冷却以后切片。论卖相，浑身乌黑，没啥亮点，简直就是一个乱头粗服个烧火个丫头，但是味道勿错，别具乡土风味，又特别耐饿。摆勒竹编个饭篮里向挂勒窗口头，久放勿坏个。所以，绍兴人出远门、走亲戚，乌豇豆糕是常备个干粮。为啥魔都个糕团店从来勿看见伊？一，乌豇豆糕是乡下人个点心，制作浪比较粗，缺乏标准，蛮难进入流通环节；二，上海个糕团店大多数是从苏州来或者是模仿姑苏功夫个，姓苏，勿姓绍！除脱仔乌豇豆糕，还有绍兴个喉口馒头、绍大麻球，上海人也呒没见到过。对了，绍兴还有种火炙糕，食品店里偶然看得见，大概已经归入非遗项目了伐！因为搭仔苏州个渊源，勒上海糕团店里还可以看到身板最薄，但是价格却是最贵个百果蜜糕。半透明个糕身当中嵌勒瓜仁、核桃、糖冬瓜咾啥蜜饯，每一口侪有细微个差别。王稼句勒《姑苏食话》里透露：蜜糕是稻香村名品。勒乾隆皇帝下江南个辰光，由苏州地方进呈，乾隆食而称美，下谕稻香村定制，呈送宫中。接下来就是大家听腻了个套路，皇帝吃了龙颜大悦，大笔一挥题了“稻香村”三字。“旧时稻香村、叶受和、赵天禄等店家承接订货，送糕上门，并当场开切、称量、包装。” 也因为搭苏州个渊源，近枪把我发现沈大成新增了一个品种：炒肉团子。王稼句勒《姑苏食话》当中也有提及：“炒肉团，姑苏夏食名点，用精细糯米粉作团，馅以鲜肉为主，辅有虾仁、扁尖、金针菜、黑木耳等，中有卤汁，外形似小笼馒头，其上微露孔隙，能见馅心诸色。”沈大成摆勒柜台浪个炒肉团子也是搿能样子了，我看见了蛮开心，但呒没买来吃。因为沈大成少了一个环节，苏州黄天源老板、陈锡荣先生曾经搭我讲起过，顾客买了炒肉团，营业员一定要拿起把铜壶，拿热个肉汤慢慢叫灌到团子个开口里向，搿能介趁热吃，味道再是最好个。王稼句是苏州人，伊哪能会得勿晓得呢！（下）鲁迅个条头糕，我个重阳糕（下）音频： 00:00/06:16 九九重阳节即将来临——重阳糕要登场了。近年来，传统文化回归，每逢此时，糕团店门口买重阳糕个小青年排起了长队，一买就是几盒头，回去孝敬父母，美意浓浓个。勒古代，时逢重阳还要登高，勒手臂浪向系好茱萸，据说可以避灾解难。“遥知兄弟登高处，遍插茱萸少一人。”“明年此会知谁处，醉把茱萸子细看。”王维搭仔杜甫个搿两句诗成了千古流传个名句。唐代个文人登高搭仔插茱萸侪要结伴而行个，类似于今朝个秋游。到了宋代，搿个风俗当中又增加了吃糕个环节。现在，上海市民也会得勒搿天举行登楼活动，金茂大厦搭仔东方明珠侪成了目标，搿个是古代习俗个都市化体现。重阳糕浪向一定要插面小旗子个，有小旗子旧意味着有得风吹过来，搿就是表示登高，因为只有身处高个地方，再能够明显个感觉到迎面有风呼啊呼啊个吹过来呀。少了搿面小旗子，重阳糕个民俗涵义就要大打折扣了。小晨光勒弄堂口个点心店里向白相，里向个师傅用汏、涮镬子筅帚拆散脱，拿伊个竹丝做小旗子，我一时头浪技痒，毛遂自荐，帮伊一道做。我有得做风筝个经验，对付搿种小物事是游刃有余个。忙了一个上半天，师傅一刻勿停个表扬我，做好以后还送了我两块刚刚出笼个重阳糕，我吃脱了一块，带了一块回去拨姆妈吃，姆妈开心得勿得了。两年前头我到苏州去，晓得电视剧《舌尖3》正好勒黄天源拍摄做重阳糕个场景，我问陈老板插小旗子了伐？回答讲呒没，我一听就急了，马上建议伊发动员工做小旗子插勒糕浪向上。《舌尖3》后首来播出，搿一集里，重阳糕浪最终还是插了彩色个小旗子。想起小辰光碰到个一桩事体。伊个一年我读小学五年级，大嬷（老爸个阿姐）从绍兴到上海来住两天，昏天黑地个啥地方也勿好去，伊是小脚，又是文盲，辣屋里向坐勒海真个是邪气厌气，偶而看到伊个嘴巴有一眼眼勒动——应该是勒念经伐。一个萧瑟个下半日，老爸差我到糕团店去，勒八仙桥龙门路转角个地方，去买重阳糕——伊个辰光重阳糕改名叫“方糕”，八宝饭呢，改名叫“甜饭”了，但老百姓心里向是有数个，勿响，照吃。我刚刚买好糕，就拨五六个中学生样子个外地青年围牢了，伊拉虽然是着勒黄军装，裤腰浪向有铜头皮带，但是满面孔个疲倦，看上去老吃力个。其中个一个问我讨粮票，伊拉肚皮饿，想买几块糕团，但是呢，呒没粮票当时辰光是勿好买糕团个。我买了糕团以后，就呒没多余粮票了。 “你家在哪里？能不能回家去拿？”对方虽然是勒搭我商量，请我帮忙，但是伊个表情看上去坚毅，目光邪气有神，我蛮吓个，就答应了。一路浪向奔回去，我个额角头浪已经汗滋滋了，父亲听了我个叙述以后，郑重其事个拿出一张5斤头个粮票：拿去，拨伊拉，顺带便问问伊拉是从啥地方来个。我再一路奔到八仙桥去，但是，糕团店个门口已经勿看见伊拉个人影子了。秋风卷起了满地个黄叶搭仔纸片，糕团店里生意还勿错，顾客个面孔浪向居然还有难得看见个笑容。有轨电车叮叮当当朝我碾压过来，突然之间转了只弯，朝外滩方向开过去了。我勿晓得伊拉从啥地方来，要到阿里去。伊个辰光，我已经能够背出几十首毛泽东个诗词了，譬如搿首：人生易老天难老，岁岁重阳。今又重阳，战地黄花分外香。一年一度秋风劲，不似春光。胜似春光，寥廓江天万里霜。朗读者：高佩明注：本文来源“老有上海味道”，原文可点击下方“阅读原文”。转自：“吳越小豬”公众号我知道你在看哟~ 推荐关注：阿拉退休人上海老底子姐妹号阅读原文喜欢此内容的人还喜欢程乃珊：穿旗袍的上海女人上海老底子不喜欢不看的原因确定内容质量低不看此公众号老字号鲜肉月饼的热销何以长盛不衰（作者：缪迅）上海老底子不喜欢不看的原因确定内容质量低不看此公众号【沪语悦读】搿座百岁老桥曾经拨上海人叫作“垃圾桥” 上海老底子不喜欢不看的原因确定内容质量低不看此公众号：，。视频小程序赞，轻点两下取消赞在看，轻点两下取消在看